دا سؤال ما بيجيش غير من حد مهتم بك ...حروف الكلمه مع
بساطتها معانيها كبيره تحس. دايماً انها ما بتطلعش من اللي قدامك غير بعد احساسه
بحالك ... ما بيقولهاش غير اللي شايفك من جوه ومتأكد من التغيير اللي بتحاول
تداريه ... بتسمعها احيانا من ناس مش على بالك بس هم واخدين بالهم منك ومن تصرفاتك
... عزيز عليهم ممكن !! أو حالهم شبه حالك ...
لكن انت بتتمنى
تسمعها من ناس معينه ... ناس لها في قلبك مكان ... ناس دايما بتدور عليهم في وسط الزحمة ... جرس تليفوناتهم لها دايما
رنة تانية ... حتى رسايلهم اللي ممكن تكون
حروفها بالظبط زي كل الرسايل اللي على
تليفونك لها معنى مختلف .
في وقت الضيقة بتتمنى مليون مره ان
"مالك؟" دي تكون منهم هم بس ... وتحلف على كلامك المحبوس جواك
انه ما يطلع غير لهم ...
الناس دي بقى ممكن جدا تكون في عالم تاني بعيد عنك ...
مش شايفينك ...
اعذارهم كتيره ؛انا شخصيا
مصدقاها ...
وعشان كل اعذارهم المقبوله ؛
لازم تعرف نفسك مكانها فين منهم ؟ قبل ما تفضل مستني سؤالهم اللي ممكن اوي ماتسمعهوش ...
لأن انت بكل بساطه الضحكه الحلوة اللي لو بهتت شوية لها
مليون مبرر عادي عندهم ...
انت لهم مجرد
ملامح بتضحك ولسه بتضحك مش مهم ايه اللي بتخبيه الضحكه.
متهيء لي الناس دي
تفضل تعاملهم بكل ود عادي وعزاك ان لك دور
في حياتهم ... انك هتكون السامع
لهم ... هتكون الحد اللي بيقول لهم (مالك) وهو
حاسس ايه ممكن يكون الرد ...
وتفتح الباب لناس تانيه تتمنى انها تخفف عنك وتقدر تسمعك من غير ما
تتكلم عشان تقدر تكمل ...
اصل دايما
حياتنا محتاجه الشخص اللي يقول لك بكل ود " مالك"؟
ليست هناك تعليقات:
إرسال تعليق